Sochar Cúramóra

Chun cáiliú do Shochar Cúramóra, ní mór duit:

• A bheith 16 mbliana d’aois nó níos sine
• Na coinníollacha ranníocaíochta árachais shóisialaigh (ÁSPC) a chomhlíonadh
• A bheidh fostaithe ar feadh 8 seachtaine ar a laghad sa tréimhse ama roimhe de 26 seachtain, ar feadh 16 uair an chloig gach seachtain nó ar feadh 32 uair an chloig gach coicís ar a laghad (ní gá duit an coinníoll sin a chomhlíonadh más rud é go raibh Sochar Cúramóra á fháil agat sna 26 seachtain roimhe sin)
• 35 uair an chloig ar a laghad d’aire lánaimseartha a thabhairt do dhuine eile thar 5 lá ar a laghad in aghaidh na seachtaine
• Gan níos mó ná an teorainn ioncaim sheachtainiúil a thuilleamh. Gheobhaidh tú tuilleadh eolais faoi theorainneacha ioncaim ar gov.ie.
• Gan bheith i do chónaí in ospidéal, i dteach téarnaimh nó i suíomh cúraim dá samhail
• Gan bheith fostaithe, féinfhostaithe, ag déanamh obair dheonach, oiliúint nó aon chúrsaí oideachais le haghaidh iomlán de níos mó ná 18.5 uair an chloig sa tseachtain

Meastar duine mar dhuine a bhfuil aire agus cúram lánaimseartha ag teastáil uaidh nó uaithi sna cásanna seo a leanas:

• nuair a theastaíonn maoirseacht leanúnach uaidh nó uaithi chun contúirt nó díobháil dó nó di féin a sheachaint, nó
• nuair a theastaíonn maoirseacht leanúnach uaidh nó uaithi i rith an lae le gnáthfheidhmeanna coirp (mar shampla, ithe, ól, ní agus gléasadh)

Is féidir leis an duine a dtugann tú aire dó nó di freastal ar oiliúint athshlánúcháin neamhchónaithe nó ar ionad cúraim lae. Mar sin féin, ní féidir cónaí a bheith ar an duine in ospidéal, i dteach téarnaimh nó i suíomh cúraim dá samhail.

Is féidir leat tuilleadh eolais a fháil faoi chóireáil ospidéil agus faoin Sochar Cúramóra a fháil inár dTreoirlínte Oibriúcháin ar gov.ie.

Tá an t-iarratas ar Shochar Cúramóra comhdhéanta de chodanna iomadúla. Ní dhéanfar measúnú ar d’iarratas mura soláthraíonn tú an méid seo a leanas:

1. An t-iarratas ar líne seo agus é comhlánaithe agatsa.
2. An fhoirm liachta pháipéir (CARMed1) agus í comhlánaithe ag dochtúir an duine a bhfuil tú ag tabhairt aire dó nó di. Má tá tú ag tabhairt aire do dhuine faoi 16 agus má tá Liúntas Cúraim Baile á íoc don duine sin, ní iarrfar ort foirm chomhlánaithe CARMed1 a chur ar fáil. Tá an fhoirm CARMed1 ar fáil le híoslódáil ar gov.ie.
3. Deimhniú Fostóra (CARB-ER1) comhlánaithe d’aon phost a bhí agat le 6 mhí anuas. Tá an fhoirm CARB-ER1 ar fáil le híoslódáil ar gov.ie.
4. Teastas Oideachais (CAR-ED1) comhlánaithe má tá tú i mbun oiliúna nó oideachais faoi láthair. Tá an fhoirm CAR-ED1 ar fáil le híoslódáil ar gov.ie.

Tá trí bhealach ann chun na foirmeacha CARMed1, CARB-ER1 agus CAR ED1 a sholáthar:

1. Uaslódáil le d’iarratas iad
2. Uaslódáil tríd an tseirbhís Bainistigh M’Éileamh ar dheais do chuntais MyWelfare iad. Beidh sé sin ar fáil tar éis duit d’iarratas a chur isteach.
3. Cuir sa phost chuig an seoladh thíos iad

Seoladh poist:
Rannóg an tSochair Cúramóra,
Foirgnimh Rialtais na Roinne Coimirce Sóisialaí,
Bóthar Bhéal Átha an Lao,
An Longfort,
N39 E4E0

Nóta tábhachtach:

Is é an bealach is tapa chun cinneadh a fháil maidir le d’éileamh ná na foirmeacha CARMed1, CARB-ER1 agus CAR-ED1 a uaslódáil i dteannta d’iarratais ar líne. Má roghnaíonn tú na foirmeacha sin a uaslódáil nó a chur sa phost tar éis duit d’iarratas ar líne a chur isteach, beidh moill maidir leis an bpróiseáil agus le cinneadh a dhéanamh. Mura gcuirtear na foirmeacha sin ar fáil laistigh de 21 lá tar éis duit d’iarratas ar líne a chur isteach, déanfar d’éileamh a tharraingt siar agus beidh ort tús a chur le hiarratas nua.