Liúntas Cúramóra

Chun cáiliú do Liúntas Cúramóra, ní mór duit:

• A bheith 18 mbliana d’aois nó níos sine
• A bheith i do ghnáthchónaí in Éirinn
• Tástáil acmhainne a chomhlíonadh
• 35 uair an chloig ar a laghad d’aire a thabhairt do dhuine eile thar 5 lá ar a laghad in aghaidh na seachtaine
• Gan bheith i do chónaí in ospidéal, i dteach téarnaimh nó i suíomh cúraim dá samhail
• Gan bheith fostaithe, féinfhostaithe, ag déanamh obair dheonach, oiliúint nó aon chúrsaí oideachais le haghaidh iomlán de níos mó ná 18.5 uair an chloig sa tseachtain

Caithfidh an duine dá dtugann tú aire a bheith:

• 16 bliana d’aois nó níos sine, agus aire agus cúram lánaimseartha de dhíth air nó uirthi ar feadh 12 mhí ar a laghad, nó
• Faoi bhun 16 bliana d’aois, agus Liúntas Cúraim Baile á íoc

Meastar duine mar dhuine a bhfuil aire agus cúram lánaimseartha ag teastáil uaidh nó uaithi sna cásanna seo a leanas:

• nuair a theastaíonn maoirseacht leanúnach uaidh nó uaithi chun contúirt nó díobháil
  air nó uirthi féin a sheachaint, nó
• nuair a theastaíonn maoirseacht agus tacaíocht leanúnach uaidh nó uaithi i rith an lae le gnáthfheidhmeanna coirp (mar shampla, ithe, ól, ní agus gléasadh)

Is féidir leis an duine a dtugann tú aire dó nó di freastal ar oiliúint athshlánúcháin neamhchónaithe nó ar ionad cúraim lae. Mar sin féin, ní féidir cónaí a bheith ar an duine in ospidéal, i dteach téarnaimh nó i suíomh cúraim dá samhail.

Is féidir leat tuilleadh eolais a fháil faoi chóireáil ospidéil agus faoin Liúntas Cúramóra a fháil inár dTreoirlínte Oibriúcháin ar gov.ie.

Tá an t-iarratas ar Liúntas Cúramóra comhdhéanta de chodanna iomadúla. Ní dhéanfar measúnú ar d’iarratas mura soláthraíonn tú an méid seo a leanas:

1. An t-iarratas ar líne seo agus é comhlánaithe agatsa.
2. An fhoirm liachta pháipéir (CARMed1) agus í comhlánaithe ag dochtúir an duine a bhfuil tú ag tabhairt aire dó nó di. Má tá tú ag tabhairt aire do dhuine éigin faoi bhun 16 bliana d’aois, níl an fhoirm sin ag teastáil; ní mór an Liúntas Cúraim Baile a bheith á íoc áfach sular féidir an Liúntas Cúramóra a bhronnadh ort. Tá an fhoirm CARMed1 ar fáil le híoslódáil ar gov.ie.
3. Deimhniú Fostóra (CA-ER1) comhlánaithe do gach post atá agat faoi láthair. Ní gá duit an fhoirm sin a sholáthar mura bhfuil tú fostaithe. Tá an fhoirm CA-ER1 ar fáil le híoslódáil ar gov.ie.
4. Teastas Oideachais (CAR-ED1) comhlánaithe má tá tú i mbun oiliúna nó oideachais faoi láthair. Tá an fhoirm CAR-ED1 ar fáil le híoslódáil ar gov.ie.

Tá trí bhealach ann chun na foirmeacha CARMed1, CA-ER1 agus CAR ED1 a sholáthar:

1. Uaslódáil le d’iarratas iad
2. Uaslódáil tríd an tseirbhís Bainistigh M’Éileamh ar dheais do chuntais MyWelfare iad. Beidh sé sin ar fáil tar éis duit d’iarratas a chur isteach.
3. Cuir sa phost chuig an seoladh thíos iad

Seoladh poist:
An Rannóg Liúntais Cúramóra,
Foirgnimh Rialtais na Roinne Coimirce Sóisialaí,
Bóthar Bhéal Átha an Lao,
An Longfort,
N39 E4E0

Nóta tábhachtach:

Is é an bealach is tapa chun cinneadh a fháil maidir le d’éileamh ná na foirmeacha CARMed1, CA-ER1 agus CAR-ED1 a uaslódáil i dteannta d’iarratais ar líne. Má roghnaíonn tú na foirmeacha sin a uaslódáil nó a chur sa phost tar éis duit d’iarratas ar líne a chur isteach, beidh moill maidir leis an bpróiseáil agus le cinneadh a dhéanamh. Mura gcuirtear na foirmeacha sin ar fáil laistigh de 21 lá tar éis duit d’iarratas ar líne a chur isteach, déanfar d’éileamh a tharraingt siar agus beidh ort tús a chur le hiarratas nua.